Раздельная Спасо-Мирожского монастыря и Семена Жаворонка с сябрами на землю Подграмскую

Се порядисеся Тимофеи игумен и чернцы святаго Спаса с Семеном Жаваранком, и с Кузмою, i с Якуномъ, и с Матвеемъ, и з Домахаю, и с Селиловою, и с Колядою, и с Василемъ и со всеми сябры их, кому часть у Подгамьи, про землю Подрамскую. И положиша межу черньцы святаго Спаса и Жаворанке i с сябры ево от дубу через селище межи дву камени и до Волотовице, а от Волотовице да Пiрошковичь ниве, а от Подграмского пути. А что пожня чернеческая на Иворовицы вошло у Сменову сторону, та пожня Смену i сябром ево не надобе. А межа орамои земли и болоту Грамскои путь. А что пожня чернеческая подъ Сменовымъ дворомъ,  а та Смену с сябры i чернцемъ не надобе. А межа пожни по дубъ да по крою на колъ да Пирошковичь пожне. А что Сменова пожня у чернечьскои стороне у Мокроусове, а та пожня чернцем у розмену, а Жаворонку с сябры не надобе. А у Лукина пожня и Сигеевиц и в Гужаеве по болото по Мошнее пожне, а то чернцем, а Жаворанку с сябры не надобе. А что селнее пожни i при Креми и болото, а у том Жаваранку с сябры третьея часть, а черньцем две части. А борть и пешня чернцемъ, а Жаворанку с сябры не надобе. А болоту межа по Лучьскую межу да Пограмьскиi путь, а то черньцем две части, а Жаваранку с сябры третьяя часть, а от поля по Зари. А воде iмъ обе обче мочи Глаи ровенъ. А путь имъ городцкиi на обе стороны обьчь. А за путь за Грамскиi Жаваранку с сябры прелезще запас сечи. А с пути ускочив псе узгоритъ векшу, а то Жаваранку с сябры без тяже убити. А чернеческиi лесъ Жаворанку с сябры не ходити у полесье. А на то послухи: Иван посадникъ, Илья Борисовъ, Андреи Стефановичь, Федоре Киселевиц, Обрадъ Клевчевиць, Анхимъ Рыгличиницъ, Евлентеи Олисимковиць, Анкипъ Михайловиць.

Добавить комментарий

Ваш e-mail не будет опубликован. Обязательные поля помечены *