Сказание о благовернемъ князи Домонте и о храбрости его.

В лето 6773. Заратишася Литва межю собою, яко же и всегда бывает князем межю брани многы и кровпролитя о соуетнемь царствии света сего; и взя Въишеглъ землю Литовскую. Тогда благоверный князь Довмонтъ съ дружиною своею и съ всем домом своим отставль отечество свое, землю Литовскую, и прибеже в Псковъ. Сии же князь Домонт || от племени литовского первие имея к идоломъ слоужение по отчю преданию; егда же бог въсхоте израти собе люди новы, и вдохну во нь благодать свтого духа в церкви святеи Троици, а наречено бысть имя ему въ святемъ крещении въ граде Пскове. И не по колицех днех поим с собою пскович ратных моужь, три девяноста, идее в землю Литовскую, и отечьство свое повоева, и княгиню Ерденевою полони, тетку свою Еупраксию, и деьи ея, и вся имениа их, и возротися со множеством полна. И перебродишеся Двиноу, отъеха за 5 верестъ, и сташя шатры на бороу чисте, а стражи поставя в реце на Двине, Давыда Якоуновича с Лувою Литвином; две же девяносте сам ся оста, ждя по собе погони. Герденю же съ своими князми дома не бывшю, и приехаша в домы своя, оже домове их и вся земля их пленена. И оплъчися Гердении || и Гортуитъ и Люмьбии и Люгаило и прочии князи в 7-мих стах рати, погнаша в следъ Домонта, хотящее и роутками яти и лютои смерти предати, а мужи его пскович мечи иссечи. И пребродившеся Двиною рекоу, сташа на брезе; стражие же видевшее рать великоу, пригнавшее поведаша Домонтоу, что рать пребродилася Двину. Домонтъ же рече Давыду и Лоуве: помози вама бог святая троиув на стражи вашеи. И пакы рече: братье моужи псковичи, кто старъ то отець, а кто млад то ми брат, слышалъ есми мужество ваше в всех странах; се же вамь предлежить живот и смерть; братие моя, протягнете за дом святыя Троици и за святыя церкви, за свое отечьство. Тогда же бе приспел день великаго и славного воеводы мученика христова Леонтиа; и помолися, глаголя: святая живоначальнаа троица и святыи велики воевода Леонтие и благоверныи княже Всеволоде, помозита намъ в час сии на спротивныя врагы. И, сиа рекши, двигнушася, и тако божиею помощию единемъ девяностом 700 ратных победи. Тогда оубиенъ бысть князь великыи литовскыи Гоитортъ, и инех князеи много избиша, а иная Литва в Двине истопошя, а инех Двина изверже 70 на островъ Гноидов, а инех на прочая островы, а инии внизъ по Двине отплышя. Тогда же убиенъ бысть един псковитинъ Антонии, сынъ Лочковъ, брат Смолиговъ, а инии вси без вреда съхранени бышя, помощию святыя троица и молитвою и воеводством святого Леонтия и благоверного князя Всеволода; и возвратишяся с радостию к городу Пскову и с корыстию. И по томъ благоверныи князь Домонт испроси за себе оу великого князя Дмитрия Александровича дщерь княгиню Марью. Пакы же на дроугыи год князь Домонт с мужи своими псковичи иде в пособие тестю своему великому князю Димитрию на Немецъ, и бишяся на Раковоре, и одолешя. По том  по николицех днех останок събравшеся поганое Латины и, пришедшее таино, взяша оукраины неколико псковских селъ, и възратишася въскоре. Боголюбивыи же князь Домонт не стерпе обидим бытии от нападениа поганых Немець, выеха в погоню в пятих насадех съ 60-ю моуж пскович и тако божиимъ пособием 8 сотъ победи Немець на реце на Мироповне, овых иссече, а инии истопша в воде, а две насаде бежаша в иные островы. Князь же Домонт, ехав, повеле зажещи остров, и егда начаша погани бегати, палимее траве, въсполеша огнемь и власи на них и порты, и тако победи ихъ, априля 23, на память святого великомученика Георгиа, помощию и молитвою его. Слышав же местерь земля Ризьскыя моужество князя Домонта, съвокупи много вои своих, ополчився в силе тяжце без бога, и прииде ко Пскову, ови на конех, а инии в кораблех и в людиахъ и с порокы, хотяще пленити дом святыа Троица, а князя Домонта роуками яти, а мужеи пскович мечи иссечи, а не противныи народ, жены и дети, пленившее, в работоу вести. Слышав же то Домонт, оплъчающася люди без ума, в множестве силы, без бога,и вниде в церковь святыя Троица, а положивъ меч свои пред олтаремь господнимь, пад, моляшеся много с плачемь, сице глаголя: господи боже силъ, мы людие твои, овца пажити твоея, имя твое призываемь, призри на кроткыя люди своя, и смиреныя възвыши, и гордых высокыя мысли низложи, да опустеет пажить овец твоихъ. Игуменъ же Сидоръ и весь иереискии чин, вземше мечь и препоясавше, благославиша и. Домонт же въ множестве ярости мужества своего, не дождав полковъ новгородскых, с малою дроужиною с мужи псковичи, выехав, изби полкы их, и самого местера раниша по лицю. Они же троупиа своя накладше, отвезоша в землю свою, а прочии остатокъ их оустримишася  на бегъ, месяца иоуня в 18 день, на память пренесению мощеи святого мученика Феодора. По прехождении же неколика времени начашя Латина насилие псковичемъ деяти, нападением и граблением. Боголюбивыи же князь Тимофеи не стерпе обижим бытии от поганыя Латины, еха с мужи своими псковичи, и плени землю их и села чюдская пожже, и полона много приведоша в землю свою. И пакы въ 30 третьее лето княжениа Домонтова, отнеле же во Пскове бысть, изгониша Немци безвестно ратью посадъ оу Пскова, марта въ 4 день, и тогда оубиша Василиа игумена святого Спаса, Иасаф игоумен Снетные горы, и черноризець много избиша и жен и детеи, а мужеи бог оублюде. В оутрии же день погани Немци остоупиша град; князь же Домонтъ не стерпе дождати муж своих большая рати, выеха с малою дружиною, противоу имъ ополчися с Иваном Дорогомиловичемъ. И помощию святыя троица победи я оу святою Петра и Павла на брезе, овех избиша и овых раниша, а инии метахуся с брега в кроучю, а самого коумендеря раниша по главе; а велневиць роуками неколико ихъ имше, послаша к великому князю Андрееви, а прочии, вскоре повергъше ороужиа, оустремишася на бегъ, страхом грозы моужества Домантова и моужеи пскович. И бяше тогда в Пскове моръ вельми золъ; тогда и благоверныи князь Тимофеи, мало поболев, преставися к богоу в вечную жизнь, месяца маиа въ 20 день, на память святого мученика Фалелея. Бяше бо милостивъ паче меры, священникы любя, церкви оукрашая, нищая милуя, и вся праздницы чесно проводя, сироты и вдовица заступая и обидимыя изимая; и проводиша его священноиноки и священники и диакони, мнихи и черноризици и все множество люди; и тако святое и честное его тело положиша в церкви святыя Троици, с похвалами и песньми духовными. Бысть же печаль и жалость велика тогда псковичем.

Добавить комментарий

Ваш e-mail не будет опубликован. Обязательные поля помечены *