Пленение царя Иваново Новуграду и Пскову

В лето 7077-го (1569 г.). Декабря въ 27 день, оклеветаша злые люди Великии Новград и Псков и царю и великому князю Ивану Васильевичу всеа Руси, бутто ся хотят отложитися Литве; и прииде с великою яростию в Великии Новгород, с силою, и плени Новград конечне, яко же и от начала бысть над ним таково зло и не мощи изрещи сицевыя беды, еже сотворися над ним: первое, архиепископа Пимина взят и в заточение посла на Тулу, и святую Софею соборною церковь пограби, и поима чюдотворныя иконы корсунския и казну всю, драгия вещи поима, и архиепископль двор и монастыри все и церкви пограбил, и всех людеи, и многих православных умучи многими муками, а прочих людеи, глаголють 60000 мужеи и жен и детеи, в великую реку Волхов вмета, яко и реки запрудитися; и по иным городомъ новгороцкимъ тако же бысть вся люди ограбил и монастыри и церкви. И сице бысть Великому Новуграду запустение. И посади намесники своя, и бысть живущимъ продажа велика и поклепы и подметы, и от сего мнози людие поидоша в нищемъ образе, скитаяся по чюжим странам. Того же году, в великои постъ на первои недели, февраля месяца, прииде царь и великии князь Иван Васильвичь всея Руси во Псковъ, опритчиною, со многою ратию, восхоте разорити градъ Псков, яко же Великии Новград; прииде с великою яростию, яко левъ рыкая, хотя растерзати неповинныя люди и кровь многую пролити. Но господь богъ всещедрыи и всемилостивыи человеколюбецъ, молитвами пречестыя матере своея владичица богородица и чюдотворца благоверного князя Гавриила Всеволода, промышляя о роде человечестем, вложи в сердце блаженному своему угоднику Саллосу Николе и христолюбцу князю Юрью Токмакову, еже преложити сердце царево от ярости на милость ко гражаном, повеле по улицам града пред домы своими трапезы поставляти и хлебы полагати; яко же и бысть. И егда же прииде князь великии на Поле близ града, и ста во обители святого Николы, на Любятове, в нощи к неделе, и начаша утреннюю звонити по всему граду, и тогда слышав князь великии велии звон, умилися душею и прииде в чювство, и повеле всемъ воемъ меча притупити о камень, и ни единому бы дерзнути еже во граде убииство сотворити; и наставшу дни, тридневному воскресению, прииде во град и удивися веледушию гражаном и любве, еже к нему показаша, стояще все коиждо пред домом своимъ со женами и детьми, изнесше хлебъ и соль пред враты и падше поклонишася цареви. И срете его игумен печерскии Корнилие со всемъ освященным собором на площади у преподобного Варлаама и у святого Спаса, и прииде в соборную церковь святыя Троица и молебная певъ, тако же поклонися чюдотворнеи раце чюдотворца Гавриила, и удивися меча его величествию, еже на гробе святого. И прииде благословитися ко блаженному Николе, иже христа ради похаб ся творя; блаженныи же поучив его много ужасными словесы, еже престати от велия кровопролития и не дерзнути еже грабити святыя божия церкви; царь же прежде сия глаголы нивочто же вменив, повеле у святыя Троица колоколъ сняти, того же часа паде конь его лутчии по пророчествию святого, и поведаша сия царю; он же ужасен вскоре бежа из града. И повеле грабити имение гражан, кроме церковного причту, и стоялъ на посаде немного и отъиде к Москве, а церковную казну по обителем и церквам, иконы, и кресты, и пелены, и сосуды, и книги, и колоколы, поима с собою.

 

Источник: Первая Псковская летопись.

Добавить комментарий

Ваш e-mail не будет опубликован. Обязательные поля помечены *